Spørsmål og svar knytt til gebyr og betaling

Faktura

• Kva gjer eg med kreditnota?
  Kreditnota er pengar til gode. Det kan vere aktuelt ved vassmålaroppgjer eller som følgje av endringar i fakturagrunnlaget. Beløpet blir satt tilbake på din konto automatisk. Ta kontakt med faktura@øyvar.no viss du ønskjer pengane inn på ein anna konto enn den som blir nytta ved innbetaling.
• Korleis kan eg motta og betale fakturaen?
  • eFaktura - er ein elektronisk faktura som blir sendt til den som er registrert som mottakar av faktura. eFakturatjenesten blir tilbode i nettbank eller mobil betalingsapp som Vipps eller mobilbank, også kalla betalingsflate. For å motta eFaktura må du velge «ja takk til alle» i betalingsflata. Du må logge inn og godkjenne betalinga i betalingsflata for at den skal trekkast på riktig dato. Du kan kombinere eFaktura med AvtaleGiro slik at fakturaen blir sendt digitalt og trekt automatisk på forfallsdato.
  • AvtaleGiro - er ei elektronisk løysing der fakturert beløp automatisk vert trekt frå kontoen du har vald på forfallsdato. Du bør i tillegg opprette eFaktura slik at du får sett fakturaen du skal betale direkte i nettbanken. AvtaleGiro kan du opprette i nettbanken din.
  • Vipps - Dersom du har Vipps kan du motta elektronisk faktura også her. Betalinga må godkjennast i appen. Ved oppretting av betaling i Vipps må du aktivt velge om du vil motta framtidige fakturaer i appen. Vipps har sitt eige kundesenter.
  • E-postfaktura - Vi har moglegheit til å sende faktura direkte til e-postadressa di. Det forutset at du ikkje har avtale om eFaktura, Vipps eller EHF.
  • EHF - er ein elektronisk faktura for bedrifter. For å kunne ta i mot faktura i EHF-format bør bedrifta vere registrert i ELMA-registeret
• Korleis inngår eg avtale om eFaktura?
  For å motta eFaktura må du velge «ja takk til alle» i nettbanken eller mobil betalingsapp som Vipps eller mobilbank. Du må logge inn og godkjenne betalinga i betalingsflata for at den skal trekkast på riktig dato. Du kan kombinere eFaktura med AvtaleGiro slik at fakturaen blir sendt digitalt og trekt automatisk på forfallsdato.
• Korleis inngår eg AvtaleGiro?

  Det er to måtar å opprette ein avtale for AvtaleGiro:

  1. Ved å godkjenne avtale om AvtaleGiro når du betaler fakturaen i nettbanken.

  2. Ved at du kontaktar banken din, og oppgjer KID-nummeret som du finn på fakturaen.

  Merk at KID-nummeret er knytt til kundenamnet på fakturaen, og ikkje eigedommen fakturaen gjeld.

• Kombinasjon eFaktura/Avtalegiro

  Dersom du har både eFaktura og AvtaleGiro blir beløpet trekt direkte frå konto. Du vil også kunne sjå faktura i nettbanken.

  Dersom nokon andre betaler for deg med Avtalegiro, vil eFaktura i kombinasjon med Avtalegiro berre bli vist til andre enn deg sjølv dersom du har gitt fullmakt til dette etter 1. desember 2021.

  Du vil likevel kunne motta ein eFaktura, men det vil ikkje vere mogleg for deg å godkjenne denne for betaling fordi Avtalegiro vil automatisk bli gjennomført i samsvar med inngått avtale med banken din.

• eFaktura - motta eFaktura på vegne av andre
  Når eFaktura blir sendt ut til mottakar basert på “Ja takk til alle” samtykke, vil alltid den som er oppgitt som mottakar på eFakturaen vere den som faktisk får den presentert i betalingsflata si. Ei årsak til dette er at det er i samsvar med personvernlovgivningen at fakturakrav berre blir presentert til rett mottakar. Dersom du ønsker at eFakturakravet skal sendast til andre enn deg sjølv, må du ta kontakt med nettbanktilbydaren din. Det kan vere dei har løysningar der du kan gi fullmakt til andre personar som nyttar same nettflate som deg, til å sjå og behandle dine eFakturaer.
• Kan eg endre beløp og forfallsdato på ein eFaktura?
  Ja, du kan endre beløp, forfallsdato og kva konto som skal belastast.
• Kvifor får eg rekningar på papir? Eg har samtykka til eFaktura

  Det kan skuldast at du ikkje hadde trykka “ja takk til alle” i det faktura blei sendt. Etter mai 2022 er det ikkje lenger mogleg å motta eFaktura-krav via dei gamle eFaktura-avtalene som du etablerte enkeltvis og direkte mot bedriftar.

  Dersom du har samtykka til «Ja takk til alle» i god tid før faktura blei sendt, kan det skuldast at vi som sender ut eFaktura ikkje fann deg i eFakturatenesta. For at vi skal finne deg som eFakturamottakar må nettbanken din ha korrekte adresseopplysningar, telefonnummer og e-postadresse. Det kan vere lurt å sjekke om opplysningane i nettbanken din er oppdaterte.

• Det er feil namn eller adresse på fakturaen, kva gjer eg?
  Ta kontakt med oss på e-post eller telefon slik at vi får rette opp i feilen. Faktura er stila til eigar av eigedommen og ikkje til leigetakar. Dette følgjer av forskrift og skuldast blant anna legalpant som er knytt til offentlege gebyr.
• Eg sit i uskifta bu og ønskjer at faktura blir stila til meg. Kva gjer eg?
  Faktura for vatn, avløp og renovasjon blir stila til tinglyst eigar. Når tinglyst eigar er død, og ektefelle eller sambuar har rett til å overta heile buet etter avdøde, vil tingretten sende ein uskifteattest. Uskifteattesten skal sendast saman med skjema «heimelserklæring i samband med arv, skifte og uskifte» når den gjenlevande ektefelle eller sambuar skal tinglyse eigedommen over på seg sjølv. Kartverket tek ikkje gebyr for dette, og det blir ikkje utløyst dokumentavgift. Meir informasjon, skjema og rettleiing finn du på Kartverket sine nettsider. Når ny eigar er tinglyst, vil eigarforholdet bli oppdatert hos ØyVAR.
• Er det mogleg å få betalingsutsetjing?

  Alle fakturaer frå ØyVAR skal som hovudregel bli betalt i sin heilskap innan oppgitt frist. Dersom du av ulike årsaker likevel ønskjer å søke om betalingsutsetjing, kan du søke om utsetjing i inntil 2 veker.

  Send oss ein førespurnad på e-post: postboks@oyvar.no

• Eg har faktura som har forfalle og eg har fått purring?
  Ta kontakt på e-post: postboks@oyvar.no for å avtale betalingsordning så slepp ein dyre inkassosalær.
• Eg har solgt ein eigedom, kva skal eg gjera?
  Eigarforholdet blir oppdatert hos oss så snart eigarskiftet er tinglyst. Faktura blir sendt til den som står registrert som eigar, og faktura må evt. gjerast opp innbyrdes mellom gamal og ny eigar.
• Eg har seld ein eigedom midt i fakturaperioden, kva gjer eg med fakturaen?

  Dei kommunale gebyra er ikkje knytta til person, men til eigedom. Fakturadato styrer kva for eigar vi skal sende faktura til. Den som var tinglyst eigar på tidspunktet vi sendte ut fakturaen, er riktig mottakar. Var du ikkje tinglyst eigar på fakturatidspunktet, kontakt oss på e-post postboks@oyvar.no.

  Fordi gebyr er knytt til legalpant vil ubetalte kommunale gebyr følgje eigedommen og blir overtatt av ny heimelshavar. Eigarskifteoppgjer er ein sak mellom gamal og ny eigar. Er det nytta meglar eller advokat, vil dei kunne hjelpe. Normalt vil oppgjer og fordeling av kommunale gebyr ordnast mellom kjøpar og seljar i høve til eigartid. Skal du kjøpe eller selge bustad med vassmålar, må du passe på at vassmålerstanden blir nedtegna i overtakingsprotokollen.

• Er det mogleg å betale dei kommunale gebyra kvar månad i staden for 6 gonger i året?
  ØyVAR erkjenner at abonnentane ynskjer fleire terminar. Det vil ta tid å legge om fag- og økonomisystema som blir påverka av ein slik omlegging. Arbeidet er i gong. Send oss ein forespurnad om du ønskjer faktura kvar månad.

Areal

• Korleis blir areal for min bustad berekna?
  ØyVAR tar utgangspunkt i arealet som står i matrikkelen (GAB). Det er bruksareal (BRA) etter NS 3940 som blir nytta i det offentlege registeret. Bruksareal (BRA) er heile arealet innanfor ytterveggene, det vil seie innvendige mål i kvar etasje. For at eit areal skal vere måleverdig må den ha fri høgde over golv på minst 1,9 m i ein bredde på minst 0,6 m. Under skråtak målast arealet 0,6 m utanfor høgda på 1,9 m eller til avgrensande vegg/bygningsdel.
• Arealet på fakturaen stemmer ikkje overeins med det verkelege arealet
  ØyVAR tar utgangspunkt i arealet som står i matrikkelen (GAB). Det er bruksareal (BRA) etter NS 3940 som blir nytta i det offentlege registeret. Dersom dette arealet ikkje er korrekt må du kontakte avdelinga for geodata og oppmåling i Øygarden Kommune; postmottak@oygarden.kommune.no .
• Eg har kjøpt blokkleilegheit. Kvifor er arealet oppgitt på faktura ikkje det same eg fekk oppgitt under kjøp av leilegheita?
  Viss du bur i eit seksjonert bustadsameie har kvar seksjon ein eigarpart som nyttast som fordelingsnøkkel. Denne eigarparten er eit tinglyst eigarforhold som blei oppgjeve ved seksjonering. Det er seksjonen sin part i seksjonssameiet. Det vil seie, at i eit seksjonssameie har du ein eksklusiv bruksrett for ein gitt del av bygget og eig tomt og bygning saman med dei andre seksjonseigarane. Det samla bruksarealet for bygget på eigedommen blir fordelt etter eigarparten for kvar seksjon. Dette er grunnlaget for kommunale gebyr for vatn og avløp. Du betaler altså ikkje berre for din eigen leilegheit, men og for din part av fellesareal som gangar, trapper, bodar, innglassingar og eventuelt anna.

Vatn og avløp

• Kvifor har eg motteke ein faktura for tilknytingsgebyr?
  ØyVAR sender ut tilknytingsgebyr til søkjar når det føreligg igangsetjingsløyve frå Øygarden kommune. Tilknytingsgebyret må betalast før ein startar med grunnarbeidet, men det er mogleg å få ei utsetjing dersom ein ikkje skal byrje på prosjektet ennå. Søknad om utsetjing kan sendast til postboks@oyvar.no.
• Korleis blir gebyra for vatn og avløp berekna?
  I Øygarden har vi ein todelt gebyrmodell; Abonnementsgebyr og forbruksgebyr. Det vil seie at det er eit fastledd som blir berekna som ein pris per kvadratmeter av din bustad og ein pris per bueining i din bustad. I tillegg er det eit mengdevariabelt ledd som anten blir stipulert eller målt. Viss det mengdevariable leddet blir stipulert er forbruket 1,2 kubikkmeter per kvadratmeter. For næringseigedommar skal det mengdevariable leddet alltid målast.
• Kva er a-konto og korleis blir a-konto innbetalinga utrekna?
  For eigedommar med vassmålar blir målaren lest av ein gong i året. På grunnlag av den avleste standen, vil vi kvart år ha eit “vassmålaroppgjer”. Vassmålaroppgjeret vil seie at den målte mengda blir registrert og innbetalt a-konto frå sist år blir trekt ifrå. Eigar av eigedommen må då anten betale mellomlegget eller får pengar tilbake. Grunnlaget for a-konto innbetaling er lik siste års målte forbruk.
• Viss vi riv huset/bygninga, vil gebyrplikta då automatisk falle bort?
  Nei. Du kan søkje om fritak for forbruksgebyret dersom bustaden blir kopla frå kommunen sitt vatn- og avløpsnett. ØyVAR skal då ha mottatt sluttdokumentasjon frå godkjent føretak om at stikkleidninga er plugga. For å få fullt fritak frå årsgebyra må du søkje kommunen om mellombels dispensasjon frå tilkoplingsplikta. Dersom søknaden blir innvilga, vil Øygarden kommune krevje betaling for fråkopling/tilkopling. Storleiken på gebyret går fram av gebyrregulativet.